飯太太的無限自由空間: Animal Communication

千里傳心

Tue, 28 Aug 2007 07:07:24 GMT

經過一波九節，終於回到香港了，比原定時間遲了12小時

今次外遊有驚有險，最後都能化險為夷，過程更是難能可貴

遊記會慢慢炮製

先講桶兜

因為回程延誤，接桶兜也要順延至今晚，所以而家還未把她們接回小島

話說在出發前已用傳心術溝通過，應承咗星期一晚會接兔地回家...

外遊第一晚用傳心術與桶兜聯絡

先找兜兜，沒回應

找桶桶，桶桶看來心情ok，見她捲成波狀休息，叫她要乖乖住幾日，她都有回答：「得嘞~~」

再找兜兜，feel到兜兜心情麻麻，好似想喊咁，仲話：「我要住屋企」

外遊第二晚再用傳心術與桶兜聯絡

又先找兜兜，沒回應，見到兜兜的姿勢是則身蝦米形躺在地上，不動...(個心寒一寒)

找桶桶，問佢見唔見兜兜？桶桶不停低沉地重覆：「你今次害死兜兜了.....你今次害死兜兜了.....」

再找兜兜，都係沒回應...

個心更加寒，>.<唔係咁脆弱啩!?

因有點擔心，所以第三日就打去找保母姐姐問吓咩情況

保母姐姐回報兔子們發晒脾氣，四圍"方便"是必定的事情了，又不肯食草架上的草

更麻煩的是兜兜「口硬」，尿尿在乾糧上

聽罷就舒一口氣，幸好還在~~大概昨天只是發脾氣的回應，不是真死！

第五日，因未能依原定計劃返港，所以通知一下保母姐姐

保母姐姐聲線很認真，說兜兜繼續尿尿在兔糧上，一直都食得很少...

儘管保母姐姐應承會視乎情況而考慮找獸醫，但兜兜的情況真令我擔心，我真怕她會...>.<

晚上在回程的飛機上，趁有點空閒，就在萬呎高空上聯絡桶兜

見兜兜企得好直在等我帶她回家，告訴她因為一點延誤，所以要遲一日才帶她回家，她好像聽不明白

最後也有叫兜兜乖乖進食，不要扭計，應承一定帶她回家

再告訴桶桶要遲一日帶她回家，她有點失望，不過都勉強回應：「好啦~」

然後桶桶送一個壽星桃的image給我看

um....是要求吃壽星桃吧！果然為食~

第六日(今日)，再聯絡保母姐姐約時間接桶兜，又問問桶兜情況，得知好了一點，可以放心

傳心術真的方便了我在外地聯絡桶兜，不過兩個大小姐真的嚇死我，又發脾氣又胡亂回答！

塔羅實習

Sat, 28 Jul 2007 03:35:20 GMT

昨晚又上Animal Communication的Study Group

接了A同學的私邦生意，用塔羅幫她占一占，早了點到場然後找個角位落閘關門

以為神神秘秘無人知，點知Rosina走咗入嚟~呵呵~撞破了，不過有著衫的，唔驚~wakaka

時辰一到，Study Group正式開始，一班人傾談一輪、分享交流...然後做練習

各人都指派做畫畫、寫字、普通問答

Rosina俾咗個機會我用塔羅做AC練習，仲有K同學肯舉手拍我一組添

嘩~好驚喜呀！

幫人做就多，幫寵物做塔羅還在嘗試的階段

平時私底下幫朋友的寵物做AC，都有時會順便抽幾張牌練吓，當係一個學習的機會

暗啞底做o既嘢，加上是電郵回覆，份外輕鬆

今次十幾人在場，我這「學神」又震又騰！萬一無靈感就好大鑊~~

好彩跟K同學都幾熟，溝通時不會太生外，少了一點壓力

想不到過程都幾順利，腦袋一直都有訊息載入

最終"塔"了三隻汪汪，直至Rosina入來叫停為止

其中一隻汪汪很可憐，是被遺棄的，K同學曾嘗試跟他溝通但不獲回應，平時汪汪也是很自閉的

汪汪兩個月大被領養後，雖則生活安定，但原來汪汪還是不快樂，吃得少、玩得少...

究竟發生甚麼問題呢？

我開了10張牌，發覺問題不在新主人身上

代表汪汪的牌是

(解：重大打擊。一次雷電就把所有人由高處劈晒落地，到處火災，往後的日子不易過)

現況的牌是

(解：不快樂的，被困在一個框架內緊握拳頭、咬實牙根，框架可能是汪汪自己設定的信念/規條，嚴謹地控制著自己，是不情願的)

建議應做的是

(解：外出逛逛，多點活動，主人繼續伴著汪汪走向光明)

避免做的是

(解：避免"源頭"，"源頭"就是被遺棄)

老師入來叫停就立即收牌，K同學把相片給老師看看，希望問多一點、幫一幫汪汪

老師收到的訊息不約而同地跟塔羅也是敏合的

我個心就安樂晒，起碼知道自己沒有解錯，而再次肯定汪汪的問題後，主人可以慢慢解難

真令人心酸

汪汪很苦啊，雖然兩個月大就被領養了，但被遺棄對他的打擊仍然很大，直至現在已生存多年也放不低

奉勸大家及奉勸大家奉勸各朋友，不要遺棄寵物

就算是非遺棄不可的，也請作個完善的安排，好讓寵物的身心能順利過渡！

遇到第一頭大話狗

Tue, 29 May 2007 14:00:15 GMT

AC同學仔又send咗幾個問題考考我

她常常灌輸狗狗一些事物/知識，然後考考同學仔，這樣練習也不錯，既可以訓練小狗、我又可以對答案

小狗甲最近弄傷了，所以去看獸醫

同學仔叫我問吓小狗乙，知唔知小狗甲弄傷哪裡？睇獸醫用了多少錢？如何弄傷？

先問小狗乙知唔知小狗甲弄傷哪裡？

小狗乙俾個影像是一隻爆了的右眼，又紅又腫，有液體流出...(嚇屎我)

然後問佢睇獸醫用了多少錢？

小狗乙答300蚊

再問知唔知如何弄傷？

小狗乙說「唔關我事」

再問小狗甲弄傷哪裡？

小狗甲俾咗個感覺我，鼻樑好痛，好似撞到鼻子抖唔到氣嗰種痛

(再三望真小狗甲的樣子，^^"好似無鼻樑喎！我對這個答案都有點動搖)

問小狗甲如何弄傷？

小狗甲答是撞傷的

完成練習就打電話搵同學仔對答案，聽完答案就笑個不停，原來小狗乙講大話

撞傷右眼是真的

獸醫費是400蚊

至於如何弄傷？原來真兇是小狗乙，小狗乙衝埋去小狗甲撞到隻右眼又紅又腫、也傷了眼角膜

但這個小狗乙竟然話「唔關我事」！

終於遇到大話狗了~

問生日禮物

Sat, 19 May 2007 02:51:59 GMT

昨晚參加了Intermediate Student Study Group，好多人呀，共15人

(不過上星期的普通Study Group還要多人，共21人)

而家學AC的人越來越多了，無論上Study Group或上Workshop都會一次比一次多人

其實都好o既，多d人接觸過就多d人了解嘛！

尋晚各同學都被random分配溝通的方式，分別是Automatic-drawing、Automatic-writing、Past live

嘻嘻~樓下嗰幅係我替別人的小狗畫o既，好好笑啊！

今次如我所願可以找人替桶桶、兜兜畫畫，趁下星期是兔地生日，就問吓兔地想要甚麼生日禮物啦~

左邊是兜兜畫的，右面是桶桶畫的
終於有頭緒送甚麼生日禮物俾兔地了...

為食兜想要一碗滿滿的綠色粒粒

為食桶想要一塊粉紅色的餅餅

嘩~高難度^^;

兜兜自上期肚仔唔舒服開始減菜、糧至今...可能想要一碗滿滿的食個夠！

唉，點算呢？豬兜呀，你唔可以食一碗滿咁多o架...咁啦~正日嗰日俾你食番餐以前的份量啦，好唔好？

桶桶可能好懷念上年生日食過的home made餅餅，係囉~都好耐無整過...

不過粉紅色點整呀？唔通你上星期見兔婆的生日蛋糕是粉紅色的，所以想要粉紅色？？唔得o架，兔地禁食人造色素

整士多啤梨味啦，好唔好？

「動物之心全接觸」籌款活動

Sun, 06 May 2007 13:21:09 GMT

現場好墟撼呀，所有Communicator都fully booked，帶R&Y小姐上去，好彩一早預約好時段試玩

一邊等候一邊四圍social吓......

與其中一位同學仔吹水(她的小狗叫"斗零")，正當傾得興起時她要走了，臨走前叫我到她的blog瀏覽和留個contact一齊互blog，說上Yxhoo blog search "dauling"就會找到......結果我回家後search "dauling", "dau-ling", "douling", "dou-ling"都是找不到~~幣！

是二十世紀一十年代的典型網絡失散。"斗零"媽見字請留言，或知情者請提供線索，重酬

今次上去除了湊R&Y小姐上去接觸AC外，另一重要目的是選購靈氣娃娃！

得到黛即場傳送Reiki，嘩~渾身是汗、慶合合...仲俾黛識穿我唔夠瞓添:p，勁~唔該晒，黛。
我個靈氣娃娃好cute o架↓

靈氣娃娃，由今晚起跟我瞓.......

突飛猛進

Sun, 15 Apr 2007 08:45:32 GMT

蔬菜盆已端出來兩三個鐘了，兔地食剩一少部份，之後都無再食了...應該食夠啦~

我坐在廳中溫書，見桶桶睡在墊蔬菜盆的報紙上

心諗：「你哋都唔食了，睡在半濕的報紙上不太衛生，不如收咗佢啦...」

只是諗，還未有行動，郁都無郁過...

突然收到：「我仲食o架！」，不久桶桶就彈起身繼續食！

好搞笑，呢個為食桶桶，唔叫收都唔去食埋佢！

丫~今日唔知點解，d訊息收得咁清o既呢!?好少可啊~

奇妙的心理準備

Sun, 15 Apr 2007 08:22:06 GMT

星期一下午就要去見獸醫了

既然學會Animal Communication，就不要浪費這種能力...

星期六晚上和飯生外出吃飯，飯生話不如同兔地講定先啦，咁我就即管試吓

因為我覺得飯桶的領悟力較高，首先同飯桶講，話佢知星期一要陪飯兜去睇醫生

回家後，發覺飯桶唔開心，食、痾、活動都沒有問題，明顯是心情沉重...我那刻沒有出聲

飯生突然問我：「你覺唔覺桶桶唔開心？」

我答：「我feel到啊！」

晚一點再跟桶桶溝通，換轉另一說法，話兜兜好唔舒服，我們要帶兜兜去看醫生

將成個過程預演一次給桶桶看，告訴桶桶當日的責任和角色...

出奇地，飯桶那股不開心的氣息緩和了，雖然是緩和了，但如果有得揀，桶桶其實是不願意的

但為了兜兜好，要委屈一點！

亦都發覺，原來「陪」和「帶」兩字對桶桶來說是有不同的意義

今天跟兜兜講星期一要去見老虎...

下午，當我坐在地上剪指甲時，兜兜慢慢走來坐在我附近，坐下來很久

(平日兜兜只會坐在桶桶附近，或者跟隨著桶桶走埋嚟我身邊，又或者寧願一個兔坐在暗角位，又或者有嘢食才痴我...好少會自發地單獨來找我)

兜兜好簡單咁同我講：「我唔想去」

嗰一刻真係好驚訝，無諗過兜兜會主動來跟我溝通，無諗過我又會收得咁清楚......

然後兜兜又斷斷續續地表示自己而家無事

我又再將外出見獸醫的過程再預演一次，希望令兜兜安心

4月練習

Fri, 13 Apr 2007 17:06:33 GMT

今晚又去Animal Communication的Study Group，好開心又見到幾個舊同學仔

其他參與的同學仔都幾厲害，得出的答案都好中o架

我也不弱，問三題中三題。通常在現場的力量較強(與在家相比)，得到的答案快、靚、正！

又同大家分享吓過程先...

同一隻狗狗傾計

問1)最近食飯少了，為甚麼呢？

答1)首先隻狗感到悶熱、焗，所以不太舒服。狗狗話d狗糧淋了，不吸引！

主人都確認答案是準確的，狗狗食糧時流太多口水，通常頭嗰幾啖的狗糧最好味，其餘的狗糧都被口水浸淋了，所以放棄！而主人也認同天氣悶熱，由今天起已開冷氣

問2)有否覺得身體不舒服？

答2)我感覺到背部有點酸痛，亦見狗狗跑步時體力不持久，很快便要停下來抖一抖

主人都確認了

問3)點解成日抓下巴，抓到損晒？

答3)狗狗話平日納悶、無細藝，加上下巴有一點點痕，注意力就放在下巴，所以就常常抓了

主人也確認了，狗狗雖然有好多玩具，但都不愛玩，寧願自己玩手手腳腳...

我就交飯兜兜出嚟問

問1)兜兜喜歡吃香蕉嗎？

答1)同學仔見兜兜會哄吓香蕉，雖然口吞著口水很想吃，但最終都不吃

正確啊！無膽兜不願試新食物啊！只會聞，不會食！香蕉都係咁話~~

問2)兜兜喜歡飯桶嗎？

答2)同學仔想像幾款唔同外貌的兔仔，show俾兜兜睇，兜兜對別的兔仔都沒反應，唯獨出現白色兔仔時表現開心，同學仔也感受到的開心，同學仔的咀自然地微笑著。所以知到兜兜所喜歡的好朋友是白色的

其實我事前不認識這同學仔，題問前也沒有給她看飯桶的相片，但竟然知到飯桶的大概外貌，而且還感受到快樂的心情！

問3)身體那裡不舒服？

答3)兜兜很怕醜和緊張，不肯直說那裡不舒服

今次兜兜的反應算不錯了，希望大家都進步到我問一句、兜答一句就perfect！

動物之心全接觸籌款活動

Tue, 27 Mar 2007 13:21:38 GMT

一個機會難逢的活動，讓你更了解「動物傳心術」........

有興趣的朋友可瀏覽官方網站：http://heart.animaltalk.info/

Animal Communication Level II

Sun, 18 Mar 2007 16:08:47 GMT

今天上完Level II的課程，之前有好多問號的topics都cover到，又加深一點認識了

聽取別人的個案分享，大家所做的個案都有深度和進步，不再是簡單的鍾意邊個/鍾意食乜...

這個環節也佔了個多小時

我最期望學的Automatic writing和drawing都學到了

過程是很興鬆的，隨心而寫/畫，要相信第一刻收到的訊息，不用加插自己的思考

在云云圖片中，我抽了一隻豹，我為隻豹所做的Automatic writing如下:

我要靠自己我要走不過我好疲倦

森林變了環境變了我都要變但不容易

Hate Change!

再抽另一幅圖片做Automatic drawing，我抽了一隻海龜，我為海龜做的Automatic drawing如下：
(唔好笑，我畫的畫係咁上下^^")

是一個受到污染的海底，有膠袋、鞋、錨...

之後講咗好多輪迴再生，在坐有好多好多疑問提出，大部份都是相信輪迴的，提問是為了更深入了解

世人認為今生做了壞事，來世就會做豬、狗、牛...etc。其實是錯誤的

這種說法貶低動物而抬高人類的地位，是不公平的

接下來是追尋動物的前世，桶桶是中國古代守護城門的士兵，兜兜則是一隻黑色老鼠，有趣！

下一部份是認識自己的Animal Guide，據說每人都有隱藏的守護神，我的Animal Guide是---Polar Bear

打開在開課前抽出的動物咭，每張動物咭都有特定的意思，是用以加深了解自己的特性

我抽到的動物咭是：

Weasal

Be the detective

Honor what you find

The truth is out there

其實這咭的運作與塔羅牌類似，每牌都有牌義，經潛意識而反映自己的特性，抽咭後再加入心靈直覺去解讀

Rosina和Debbie話我有偵探頭腦，喜歡追尋答案......

這班Level II的同學的水準都很高，個個都準備充足，所以進度幾好，Rosina話比以往的Level II好，能量也很強

其中一位男同學專誠由台灣飛過來上課的，非常有心

Advance Workshop在11月尾舉行，學費不菲，還要準備9個case study，要預備一份專業的presentation，兩日一夜，包食宿......

我要好好為進級而準備，首先要找9個有研習價的個案，努力！

又一分享

Sat, 10 Mar 2007 04:46:22 GMT

昨晚又去A.C.的Study Group，越來越熱鬧啊，好多新加入的同學，不過亦有好多舊人唔見咗

今晚同一隻8歲的松鼠狗傾計

問1)：一隻狗同伴離世了，想問松鼠狗有無掛住？

咁我見松鼠狗睇落都不太哀傷，又繼續好痴人，成日企起身咁，睇落好活躍。

答案：松鼠狗主都覺得對，感覺松鼠狗不太難過

問2)：問松鼠狗喜歡吃狗糧還是蛋糕？

我見到是蛋糕。

答案：是正確的

這晚有很多高班同學，繼續有塔羅、Automatic drawing & writing

好想試下叫桶桶寫隻字或畫幅大作，可惜時間不夠，無我份囉

唯有再等啦，下星期會上Level II，到時有得學Automatic drawing & writing

不過寫文/寫畫都唔係我的強項，唔知學唔學得好呢？

雖然自己無得試，不過都講講其他同學的案例：

1)一隻白色小狗，只寫了一句"I Love You"

好sweet啊！狗主話她平時好錫白色小狗，成日同佢講好愛佢，成日都問小狗愛唔愛主人

到昨晚終於收到文字回覆啦^0^

2)一隻雪橇寫咗一大篇英文出來，大概是話落街散步時同一隻狗朋友傾計，那狗朋友不停同雪橇講「你爸爸、媽媽唔要你」，成日對雪橇都重複類似的說話。

雪橇每到晚上都想衝上床，成晚都好緊張地留在主人身邊，應該是心中有恐懼......

雪橇女主人話大概估到是哪一隻狗，我們一班同學起哄"嘩！隻狗咁衰o架"......

^^?點解兩隻狗會傾這些話題呢？

經過一輪集體討論，Rosina問雪橇女主人是否打算生BB？是啊，真相終於大白了

原來雪橇主人曾經討論過有關話題，如下：

男主人問女主人："你生BB點樣養狗？"(明顯地，男主人的意思是狗與BB不能共存)

女主人回答："生咗BB之後都會繼續養狗"

雪橇就係擔心主人生BB後會遭遺棄，所以......

好神奇啊！以上兩個case都不需主人在事前透露太多

雖然Automatic drawing/writing看來是隨隨便便寫下的字，沒始沒終的文章，這就正如小孩子一樣的表達方式

旁人好難明白堅定流，只要經過主人的細心分析和回想後就能迎刃而解

查案

Fri, 02 Mar 2007 08:52:24 GMT

最近沉迷玩塔羅，已經很久沒有練習AC了，另一個原因可能係無咩新案件啦...

昨晚收到求助，是查案的，很有挑戰性！

今早起床就「開庭」

案件簡介：甲乙丙狗3隻，早上吃過早餐後，其中兩隻(甲和乙)打起上來。當時沒有人類在現場，只有丙狗看見事發經過。男主人聽見打交聲就立即現身調停，最後乙嘴巴和男主人的手均告受傷...

要求開庭查案的是女主人，想知發生咩事？三狗平日是合得來的，但偶然就發生打鬥，女主人束手無策~

先問丙狗，睇吓丙狗知唔知發生咩事？

丙狗俾咗段片我睇，內容是甲狗不停撲乙狗的頭，而乙狗又吠咗幾聲，兩狗的動作都很快速。丙狗把自己置身事外，亦沒有太多資料提供，還示意唔好再煩。

再問乙狗...

乙狗俾咗段片我睇，內容是乙狗自己懶洋洋地休息，一副不願郁動的樣子，甲狗走過來左哄右哄，搞到乙狗好唔耐煩，最後糾纏起來。

再問甲狗...

甲狗很精靈，動作多多無時停，我睇到甲狗是好動的。甲狗俾咗段片我睇，內容是當時乙狗正在無所事事，甲狗活躍地走向乙狗，先用頭頂頂乙狗的手、腳、尾巴，似是想逗乙狗一起玩，不過乙狗毫無反應。於是甲狗把行動升級，開始撞吓乙狗的身體、左哄右哄...不久就開始打起來了。

與甲乙丙狗溝通過後便聯絡女主人，告知「開庭」後的結論。大喜！甲乙丙狗的性格和日常生活情況確實如此。而打交的因由終於真相大白，就是好動的甲狗想找好靜的乙狗玩耍，結果就打起上來了。

找到原因之後，下一步是嘗試感化甲狗...

我的第一幅塔羅牌

Tue, 13 Feb 2007 18:47:22 GMT

今日去咗New Age Shop挑選我人生中第一幅塔羅牌

聽聞那裡最齊款式的，又有Sample睇

左諗右諗，睇中咗一幅Sacred Rose，可惜無貨

最後買咗一幅Rider-Waite，最普遍而又適合新手上路

為甚麼會有一鼓動力去鑽研塔羅？

皆因上星期參加Animal Communication的Study Group時，有幸得到高班同學Andrew給我大開眼界

當晚是我第一次接觸塔羅，先替兜兜問三條問題：

1)對舊主人的居所的感覺

卜：忘記是怎麼樣的牌，牌面是灰灰暗暗的，Andrew一開牌就表示兜兜不太喜歡舊居所了

2)對現時居所的感覺

卜：(Five of Coins，畫面是風雪交加的場景，一隻住在熱帶地方的象和長勁鹿滿面憂愁地站著)

顯示兜兜感到寒冷或生活有不足；畫面營造兩個動物，暗示小倆口互相扶持，代表關係深厚

3)對我的感覺

卜：(The Sun，如下圖)

表示滿意、無私的心境、日常生活中的愉悅、一位好朋友

解說3條問題後，真的有點擔心兜兜現時在那方面感到不足

Andrew解說可能是身體狀況不太好

這也有可能啊~兜兜的身體狀況有幾「好」，係人都知啦^^"

之後再問多兩個問題：

4)兜兜對桶桶的感覺

卜：(Ten of Cups，如下圖)

解友誼、歡喜、愉悅

5)桶桶對兜兜的感覺

卜：(Four of Wands，如下圖)

解協調、和平、和諧生活

經過5條問題之後，令我驚訝塔羅牌的準確

尤其是關於第3-5的問題，無花無假，抽出每張牌也是成雙成對的

而確實我們三個之間的關係都是不錯的

原來塔羅都可以是與動物溝通的方法

所以我想學塔羅！

借用曾特首的一句："我要占好呢個卜"

寵物思想

Wed, 24 Jan 2007 05:26:15 GMT

趁工作不太忙的時候做個case...有感而發！

寵物是非常忠心的

就算待遇不太好，也不曾想過「轉會」

仍然想繼續留在主人身邊

就算不被關心、沒有得到適當的照顧也沒所謂

聽落真的有點心痛！

又一次成功

Tue, 19 Dec 2006 16:59:26 GMT

近日忙到甩碌，風塵僕僕...

忙中抽點時間做練習，與一隻已離世的小貓聯絡

主人依然掛念著小貓，問咗幾個問題，再託我對小貓講幾句說話

因為主人還是不捨得小貓，很感人！

我與小貓溝通的過程裡偶然會熱淚盈眶，只好分幾次進行

分開幾日做，前日終於完成，立即回覆那主人

今日得到貓主的回信，再次令我感到心靈感應的神奇

我估中了小貓臨離去前是那裡不舒服

我得到一個小貓在外國生活的畫像是真有其事的

今次亦都替貓主把心裡面的結解開一點點

好開心，可以把學到的幫助別人！

又上一課Animal Communication

Sun, 10 Dec 2006 15:41:41 GMT

今日又上一課，其實前日也上了Study Group

不過兩節的對手也是問了一些沒確實答案的問題

與離世的動物溝通，更是沒有確實答案的懸案

做完練習後未能對答案，欠了一點成功感

其中一條題目算是準確的：

同學問她的臘腸狗喜歡家中甚麼人？

我一開始問就不停收到"爸爸、爸爸、爸爸..."

答案是對的！

與動物談判去解決問題，更是我的弱項

原本role play諗住出去扮狗，結果被編做中間人，處理一件無厘頭難題

好彩最後一個環節是介紹水晶，啱晒我呢d神婆聽

原來水晶也可用在動物身上，我仲以為只是人類的小玩意添

最後睇中三款水晶，「地主」售賣的水晶也又平又堅，所以委託「地主」幫忙訂購

好，完成Level I，歇幾個月再上Level II~~

奇妙經驗

Fri, 17 Nov 2006 17:35:34 GMT

參加了Animal Communication Study Group，過程跟上次大同小異，專注做練習

因在家中練習的效果一般，被編去同樣遇到困難的一組，兩貓主、兩兔主

無可厚非，貓和兔也是較難溝通的動物！

"特殊小組"有Rosina帶領grounding，我又渾身發滾了

在家中做grounding也不是太滾，每次跟Rosina做grounding都發熱，@@"唔通我連結了Rosina？

和一位貓爸互相做練習

每人三個問題，但其實貓爸都無咩想問隻貓^^;

最有肯定答案的是第三題：bebe(貓)平日最愛玩哪款玩具?[二選一：毛毛捧或床仔]

是床仔，我中了！我見到bebe在床仔裡滾來滾去，好似好好玩咁。貓爸也確認了

竟然不是一般貓貓也熱愛玩的毛毛捧，我答中了~yeah~

我發三條問題

1)飯桶平日吃得飽嗎？[其實我都唔知o架，桶桶咁大食，成日都想食嘢，我想問吓佢其實飽唔飽咁囉]

2)飯桶喜歡跳上窗台嗎？

3)飯桶在籠中吃完乾糧後通常是甚麼姿勢休息？

這貓爸回家練習都不太成功，多數是接收feeling，更多時候是得不到回應

貓爸唔肯定飽唔飽，感覺到飯桶食緊粒粒糧，所以回答吃得飽

貓爸又答飯桶在窗台上慢慢地行來行去，唔知算唔算喜歡...之後貓爸開始諗唔到嘢，Rosina單獨再輔助貓爸

隔一段時間後，貓爸話收到第三題的回應，得出的答案雖然不貼題但也很令人鼓舞，其實個答案有點似在回答第二題！貓爸看見閃爍中的"好"和"通"兩個中文字、看見水、看見綠色、左眼不停震

Rosina和黛試著解迷，大家都憑著這些線索再深入思考...好=Good、通=Communicate...

嘻嘻，原來是桶桶告訴他正式展開Good Communication

水、綠色...有來過我家的朋友，記得由窗台向下望是甚麼東東嗎？桶桶經常跳上窗台就是喜歡望這些！

左眼不停震，大概可能是桶桶正在用後腳抓痕或用前手洗臉吧~

因同行的兔友沒帶照片，所以我借出兜兜的照片給他們做practise，問了三個問題

1)飯兜今年幾多歲？同學答9!?嚇了我一跳>.<(不過Rosina解釋動物對時間的觀念不同人類，兜兜應該不會有確實答案)

2)飯兜平時在那裡休息？同學答窗台，睡在窗台上一張淺色的氈。哇~中了，連窗台上有張氈都知道啊！

3)飯兜在籠內時看見甚麼會感到驚嚇？同學不知道

這晚的交流真的不錯，也是一個好好的練習機會

我心裡面的愛滿瀉到你的心裡。我們現在已經相連起來。

Sun, 29 Oct 2006 16:58:29 GMT

上了一個非比尋常的課程----Animal Communication

是甚麼東東？信則有、不信則無，很難把它具體地解釋

上完一課之後，我都唔能夠肯定地講出點樣做

但是，我做到了！

(但只是做到與別人的狗狗溝通，兔地原來是很難溝通的)

1st session---meditation

Rosina點起white sage圍著我全身燻一轉，淨化，消除負能量。返回座位，慢慢有點奇怪的感覺，覺得外面靜了一點，坐得舒服咗...

播一段錄音，帶領各人進行meditation...我全身放鬆盤膝而坐在地上...我嘗試理性地留意著錄音裡每一字每一句，更留意著背景聲音有甚麼特別之處，我想留意吓錄音內容有無做手腳的破綻、有無priming。結果聽落無甚特別。中段曾經感到有一陣風迎面吹過來。Meditation完結時，我雙手太放鬆了，失去了知覺，唔知係唔係自然現象呢？除此之外，就沒有特別感覺了，更沒有進入甚麼神奇境界。

2nd session---Grounding

連接Mother Earth、Father Sky、Animal Tail。我跟著做...全身發滾...滲出熱汗...心跳加速

停下來，聽一陣講解，身體回復原有的正常感覺。再進行Grounding，又再全身發滾...滲出熱汗...心跳加速

有些同學也有這種感覺

3rd session---Heart to Heart

正式與動物溝通了，先拿出兜兜的照片，問三條問題！

首回

第1問：你今年幾多歲？(無答案)

第2問：你喜歡吃甚麼菜？(腦海裡有一棵油麥菜)

第3問：你喜歡「飯桶」嗎？(無答案)

Rosina叫我改問題...第4問：你喜歡新籠嗎？(看見兜兜在籠中跳來跳去)

Rosina話兔子未必喜歡說出答案，所以跟兔子溝通比跟狗狗、貓貓來得困難。

我當時有點懷疑自己的答案，心諗...油麥菜幾乎是我日日買給牠們吃的蔬菜、加上今早又見到兜兜圍著新籠四圍走...這答案可能是加入了自己的想法

次回

與另一位同學合作，她的寵物是一頭混種松鼠狗，互問對方三個問題

同學第1問：狗狗最喜歡家中那一人？(腦海裡閃出一個中年女人。答案就是媽媽，中了)

同學第2問：狗狗喜歡睡在甚麼地方？(腦海裡閃出一個門口。答案是梳化底，我答錯了)

同學第3問：狗狗經常在窗台上望甚麼？(腦海裡閃出一個影像，窗台上有公仔，狗狗走上去挨著公仔。還未答中是望甚麼，不過現實中那窗台真的是有一個公仔，那狗狗很喜歡玩那公仔)

我1問同學：兜兜喜歡在那裡睡覺？(同學見到兜兜睡在木屋內。似乎中了，兜兜真的很喜歡睡在「平頂木屋」內。但原來那同學所想的木屋是卡通片那種「三角頂木屋」)

我2問同學：兜兜鍾唔鍾意出街？(同學見到兜兜在一個倉鼠玩那種圓型滾輪內逛跑。唔知點解^^?)

我3問同學：兜兜喜歡吃西瓜嗎？(兜兜無回應。事實上兜兜是不吃西瓜的)

集體討論過後，Rosina吩咐我們再重做Grounding，再次連接Mother Earth、Father Sky、Animal Tail。

三回

與另一位同學合作，她的寵物是一頭大沙皮，互問對方兩個問題

同學第1問：阿慒喜歡沖涼嗎？(我腦海閃出一個正在放水的花灑，當花灑靠近阿慒時，阿慒跑開了。答案是阿慒不喜歡沖涼，中了)

同學第2問：阿慒較喜歡肥仔還是阿維？(答案是肥仔，我又中了)

我今次拿飯桶的相片出來

我1問同學：飯桶喜歡吃粒粒乾糧還是草？(沒反應)

我2問同學：飯桶喜歡小霸王嗎？(同學看見飯桶行埋去小霸王面前聞一聞，然後慢慢走開了，同學以為是普普通通啦，唔太喜歡又唔太討厭。其實有少少答對，牠們是世仇，聞到之後行開可能是不喜歡)

四回

在大袋中隨意抽出一件動物的隨身物品，我抽了一條墨綠色的幼身帶。

Rosina要求我們形容那物主的特徵。我心想，繫繩必定是狗用的，幼身狗帶必定是小狗用的，是常識題，好易答。再問下去，焗住再諗多d嘢。我見條狗帶有點披口，斷估是被小狗咬的，感覺到那小狗很頑皮。腦海中突然想到灰色，心諗這個配色方法又好正路喎，灰狗帶上墨綠色狗帶都好襯。突然又浮出淺啡色，這個我自己解釋不到原因。結果我交出的感覺是：小狗、頑皮、灰色、啡色。Bingo！是Rosina其中一頭小狗，是混種的，又灰又啡，Rosina說那狗狗是頑皮的。

六小時過去...

每次Grounding、Heart to Heart都全身發滾...滲出熱汗...心跳加速，我覺得『真係有d嘢』

3個sessions完結，我最後做到了！

不過跟兔子溝通真是有點困難，可能是桶、兜唔多願睬人